طعم الخوف

لفيت بلاد أبحث عن الطبيب والأمل

اداني دوا لجرحي يدوب اكتمل

اتفتح الجرح من جديد فيا

دواك يا طبيب خلص .. وإيه العمل

***

انت بعيد يا طبيب عن أرضنا

حتي نجوم السما نسيت كلام حبنا

الحزن بقي مالي المكان يا طبيب

من يوم غيابك ما دقنا طعم الهنا

***

قلبي مجروح أنا من الوجع ينزف

والدنيا مالها طعم .. أنت أكيد تعرف

كنت قنديل الضيا تنور لياليا

وإن هان عليك الحب.. مركبي يحدف

***

الشمس والقمر ضياءهم من شعاع واحد

والخوف في ليل الضلام ..صبح مارد

جريت وراه ...لجل ما أخوفه

لقيته مجروح... أتارينا بنشرب في كاس واحد

***

أنا غياب خلي علمني الملل

كسر همتي وصابتني كمان العلل

الحزن زي الفرح ..الأتنين بطعم المر

كشف طبيب تاني قاللي..معمولك عمل

عابر سبيل

موت يا قلب

لما يبان لك صاحب

الحب قال كلمته

لا قاضي ولاحاجب

ومادام ماعرفتش تكون انسان

لفظوك قلوب النسا

من هوان لهوان

اطلع من اصلك وتوبك

وانسي الصورة والعنوان

محنية عينك والبصة ليه

مابانش ليها بيان ؟

عدي وفوت

دوس ع البيوت

وقف زمانك

وإمحي مجئ المكان

ارفع صوتك لجل ما تسكت النسوان

من بعيد أشوف البسمة ملو الورق

بسمة مليانة بجهد العرق

أنا اللي عشت أسقي الحب للعاشقين

لحد ماعمري مني اتسرق

والقلب مني اتحرق

سلمت قلوعي للغربة

اكلي وزادي الغنوة ع التربة

كلوا واشربوا أكلي وزادي

أنا لاهأهجر يوم غربتي

ولاهأرجع في يوم لبلادي

بإيه تفيد يا حب شاب مطفي العيون

كاره زمانه وهارب من سجون الكون

شاب في كل الأرض العريضة

بأحلم بنجمة بيضة

منورة في ايديا

تزيل ظلام الكون حواليا

نجمة تصبح في الشوارع ناس

تحميني من الحراس

تسلملي ع اللي كسر رمشي

تاخدهولي بالحضن وبعدين تمشي

أه.. لو ضاع من زماني

ونسيتني أحضاني

أه.. لو أفقد مكاني

كل ما أخرج من مكان

ما أرجعش ليه تاني